Oddfellowreglan gefur 59 milljónir króna til mannúðar- og mannræktarverkefna í tilefni af 200 ára afmæli sínu
Oddfellowreglan á Íslandi á 200 ára afmæli í dag og veitti af því tilefni samtals 59 milljónir króna til styrktar þremur verkefnum félaga og samtaka sem sinna mannúðar- og mannræktarmálum.
Þetta var tilkynnt í afmælishófi Oddfellowa í Reykjavík í dag að viðstöddum Guðna Th. Jóhannessyni, forseta Íslands, og Degi B. Eggertssyni borgarstjóra.
- Kvennaathvarfið fékk 32 milljónir króna til að borga fyrir tvær íbúðir í nýju áfangaheimili sem rekið verður af sjálfseignarstofnuninni Arnrúnu.
- Samhjálp fékk 20 milljónir króna til að ljúka uppbyggingu meðferðarheimilisins Hlaðgerðarkots.
- Húsfélagið að Háaleitisbraut 13 fékk allt að 7 milljónir króna fyrir lyftu og uppsetningu hennar í húsinu. Þar eru undir sama þaki mörg samtök og félög sem sinna velferð barna og fjölskyldna þeirra.
Minningarreitur í Laugarnesi
Í afmælishófinu var sömuleiðis undirritaður samningur Reykjavíkurborgar og Oddfellowreglunnar um minningarreit í Laugarnesi í Reykjavík þar sem Holdsveikraspítalinn stóð. Spítalinn var gjöf danskra Oddfellowa til íslensku þjóðarinnar árið 1898.
Þessi viðburður markar jafnframt upphafið að starfsemi Oddfellowreglunnar á Íslandi.
Oddfellowar sjá um að gera minningarreitinn og greiða framkvæmdakostnaðinn en munu síðan afhenda Reykjavíkurborg hreitinn til eignar, viðhalds og umsjónar.
