Afhending styrks úr Búverðlaunasjóði Staðarsveitar

Fimmtudaginn 16. september 2010 fór stjórn Stórstúku Íslands vestur í Staðarsveit á Snæfellsnesi. Erindið var að afhenda styrk úr Búverðlaunasjóði Staðarsveitar en sjóðurinn hefur verið í umsjá Reglunnar í rúmlega 70 ár. Styrkurinn sem er fyrir árin 2008 og 2009 var að upphæð kr. 800.000.

Var þetta í þriðja sinn sem Stórstúkustjórn fer vestur til að afhenda styrkinn sem hefur verið afhentur fyrir tvö ár í senn. Fyrsta ferðin var í júní 2004, síðan í júní 2006 og loks nú í september 2010. Síðast þegar styrkurinn var afhentur, árið 2008, komu sveitungar Staðarsveitar, sem voru á ferðalagi um Reykjanes, í Oddfellowhúsið við Vonarstræti þar sem Stórstúkustjórn tók á móti þeim og afhenti styrkinn formlega . Eftir því sem best er vitað eru þessi persónulegu samskipti við afhendingu styrksins nýlunda og hefur það verið sérstaklega ánægjulegt að heyra hve vel styrkir úr Búverðlaunasjóði Staðarsveitar hafa komið sér fyrir sveitafélagið sem nýtir þá einkum til kaupa á landbúnaðarvélum. Telja stjórnarmenn Búnaðarfélags Staðarsveitar það fullvíst að Staðarsveit hafi verið ein best setta sveit landsins áratugum saman hvað þetta varðar.

Stjórnarmenn Búnaðarfélags Staðarsveitar tóku á móti Stórstúkustjórn í Gistihúsinu Langaholti en þau voru Ragnhildur Sigurðardóttir, Þóra Kristín Magnúsdóttir og Bjarni Einarsson en tveir stjórnarmanna áttu ekki heimangengt.

Búverðlaunasjóður Staðarsveitar á sér sérstaka sögu. Hann var stofnaður með gjafabréfi dags. 20. maí 1936 af Jóni Sveinssyni, trésmið, sem var bróðir í St. nr. 1, Ingólfi og fól hann stjórn Lands-Stórstúku Íslands, I.O.O.F., að annast sjóðinn og er það greinilegt að hann sem Oddfellowi hefur best treyst Reglunni til að halda utan um sjóðinn og varðveita. Br. Jón var fæddur í Staðarsveit og bjó þar fram til 23 ára aldurs. Hann var óvenju víðförull maður og víðsýnn og hefur greinilega haft mjög sterkar taugar til átthaganna.